კახეთში ტურისტული ინფრასტრუქტურის მშენებლობა გრძელდება
როგორც მოგეხსენებათ ამჟამად მიმდინარეობს სიღნაღისა დაგურჯაანის მუნიციპალიტეტების ტურისტული ინფრასტრუქტურის სამშენებლო სამუშაოები. სწორედ ამ პროცესის მოსანახულებლად ჩავიდნენ სამუშაოს ადგილად საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრ, მაია ცქიტიშვილი, კახეთის მხარეში სახელმწიფო რწმუნებული ირაკლი ქადაგიშვილი და გურჯაანის მაჟორიტარი დეპუტატი დავით სონღულაშვილი.
ეს ღონისძიება შედის მთავრობის მიერ ადგლობრივი წარმოების მხარდაჭერის პროექტში. მიმდინარე სამუშაოების ფარგლებში ინფრასტრუქტურის სამინისტრომ გადაწყვიტა სიღნაღის მუნიციპალიტეტში ბოდბის მონასტერთან მისასვლელი გზის, ავტოსადგომისა და ვიზიტორთა ცენტრის აშენება. ტურისტების და მომლოცველების ავტოტრანსპორტის სიმრავლის გამო მონასტერთან არსებული ინფრასტრუქტურა ვეღარ აკმაყოფილებდა გაზრდილ მოთხოვნას, რის გამოც ბოდბის მონასტერთან ხშირად იქმნებოდა საცობი.
ხოლო რაც შეეხება საბოლოო შედეგს, გეგმის მიხედვით, მშენებლობის დასრულების შემდეგ, დამთვალიერებლები მონასტრის მიმდებარე ტერიტორიაზე შეძლებენ ისარგებლონ ორდონიანი ავტოსადგომით, რომელიც იქნება კეთილმოწყობილი თანამედროვე სტანდარტების შესაბამისად და სრულიად დააკმაყოფილებს ტურისტთა მოთხოვნებსა თუ სურვილებს. ეს კი კიდევ ერთი ნაბიჯით მიგვაახლოებს ამ ტურისტული ადგილის მოდერნიზაციისკენ და უფრო კომფორტულს გახდის მას ვიზიტორებისთვის.
ამავდროულად, აქტიურად მიმდინარეობს გურჯაანის პარკის გამწვანება-კეთილმოწყობის სამუშაოებიც. პარკის ტერიტორიაზე მოეწყობა დასასვენებელი ზონები, ბავშვთა ატრაქციონები, განათების ბოძები და საფეხმავლო ბილიკები. დამონტაჟდება სკამები, სანაგვე ურნები, მოეწყობა მწვანე საფარი. პროექტის ფარგლებში, აშენდება ვიზიტორთა ცენტრი, ადმინისტრაციის შენობა, სპორტული მოედანი, ფანჩატური. ასევე რეაბილიტაცია ჩაუტარდება საზაფხულო კინოთეატრს, ამფითეატრს და პერგოლას. გურჯაანის პარკის ტერიტორიაზე ასევე, ჩატარდება გარე განათების, სანიტარული კვანძების, წყალმომარაგების, კანალიზაციის და კეთილმოწყობის სამუშაოები. საბოლოოდ, პარკის ტერიტორია შემოიღობება და მოეწყობა დეკორატიული კუთხე. ეს პროექტიც გათვალისწინებულია საქართველოს 2020 წლის ბიუჯეტში.
ვიცე-პრემიერის განცხადებით, მნიშვნელოვანია რომ თითოეულ რეგიონში იყოს უზრუნველყოფილი ისეთი ინფრასტრუქტურა, რომელიც თავის წვლილს შეიტანს მის განვითარებაში და ასევე მრავალ მხრივ შეუწყობს ხელს ამ რეგიონის შემოსავლიანობის გაზრდას.
„ძალიან ბევრი პროექტი გვაქვს, რომელიც მიმართულია რეგიონული ინფრასტრუქტურის განვითარებაზე, ერთ-ერთი მაგალითია გურჯაანის პარკის რეაბილიტაცია. ეს არის ისტორიული პარკი, რომელიც ცნობილი იყო როგორც სხვადასხვა ღონისძიებების მოწყობის ადგილი და შესაბამისად მისი აღდგენა და ძველი ფუნქციის დაბრუნება ხელს შეუწყობს, როგორც გურჯანის მოსახლეობისთვის კომფორტული პირობების შექმნას, ასევე გურჯაანისთვის იმ ცენტრის ფუნქციის დაბრუნებას რომელიც დაეხმარება ქალაქს დამატებით ტურისტების მოზიდვაში. გარდა ამისა ჩვენ ტრადიციულად ვავითარებთ ტურისტულ ინფრასტრუქტურას სხვადასხვა კულტურულ ძეგლებთან, შესაბამისად, ბოდბესთანაც ვაწყობთ ტურისტულ ინფრასტრუქტურას- პარკინგს, ვიზიტორთა ცენტრს. ამასთანავე ძალიან მნიშვნელოვანია წყალგაყვანილიბის სისტემის და საგზაო ინფრასტრუქტურის მოწესრიგება. მნიშვნელოვანი პროექტია გურჯაანის შემოვლითი გზა, რომელიც მსოფლიო ბანკის დაფინანსებით ხორციელდება, დაახლოებით 40 მილიონი ლარის ღირებულების სამუშაოა და უკვე წელს გვექნება უსაფრთხო და სწრაფი გზა მგზავრობისთვის, ეს მისცემს დამთვალიერებლებს საშუალებას მეტი ლოკაცია მოინახულონ ტურისტული მარშრუტის გავლისას და შესაბამისად ეს ყველაფერი ემსახურება იმას, რომ ყველა რეგიონში შევიდეს მეტი შემოსავალი“, -აღნიშნა საქართველოს ვიცე-პრემიერმა, მაია ცქიტიშვილმა.
გურჯაანის მუნიციპალიტეტში სამინისტრო ახმეტა-თელავი-ბაკურციხის საავტომობილო გზის 15,5 კმ-იანი მონაკვეთის სამშენებლო სამუშაოებს ახორციელებს. პროექტის დასრულების შემდეგ გურჯაანი-ბაკურციხის მიმართულებით მოძრავ ავტოტრანსპორტს, საჭიროების გარეშე აღარ მოუწევს გავლა გურჯაანის მუნიციპალიტეტის ქალაქ გურჯაანში და მიმდებარე სოფლებში გზის სამშენებლო სამუშაოები წლის ბოლომდე დასრულდება. ეს არის სულ ამოდენიმე იმ მიმდინარე პროექტებიდან, რომელთა მთავარი მიზანიც კახეთის ტურისტული ინფრასტრუქტურის გაუმჯობესებაა და მომავალშიც ველოდებით ბევრ მსგავს ღონისძიებებს.
